Sterbelotto

Wia mia mit dem Lotto ogfanga ham, warn so de Tipps da Vazlav Havel oda da Jelzin, oba der hod se wieda darapplt, ha, vielleicht hod a sei Wodka-Markn gwechslt. Oana wollt ja af den Österreichischn Präsidentn wettn, i woaß etzt garnet wiara hoaßt, oba den hamma ned zuaglassn, mia ham ja gsogt, mia tippn nur auf Prominente. I moan, wer hätt si do af de Lady Di setzn traun? So gseng miaßt ma ja etzt af de Victoria von Schwedn setzn.

Af den John Denver hod aa kona tippt. Der is ja in de ganzn Nachrufe als der Heile-Welt-Sänga verschrian worn, des paßt mia net ganz. I hob nix gega de heile Welt. I denk, mia olle strem danoch. Gfährlich wirds erst, wenn ma so duat, wia wenn mas scho hätt. Und des glaab i, hod da Jahn Denver nia.

Gwunna bei dem Sterbelotto hod mei Frau, de hod af de Mutta Theresa tippt. Weil owa de Weiba aa imma zammholtn miaßn.

Also, mei Favorit war, trotz am Harald Juhnke, der Papst. Oba, i daat song, der spuit falsch. Der sogt se, dahoam sterm d Leit, und fahrt in da Weltgschicht ummanand. Da Gevatta hetzt hintaher und dawischt nan ned. Böse Zungan behauptn ja, er kannt beim "Wettn daß" mitmacha und hundert Flughäfn am Gschmack ausanander holtn. Etzt aa nimma, er kimmt ja nimma obe am Bodn. I moan, etzt fahrt der senile Knacka in de dritte Weld, in Lända de aus olle Nähtn platzn, wo de Leid reihenweise vahungan, weils nimma fia olle glangt und weddat gega de Geburtnkontrolle. Dea beziagt seine Einsichtn wohl von höherer Instanz, der braucht se nix um so Tatsachen schern wia der, daß der, der Kinder sät, Hunger erntn wird. Und wia sei Big Boß gsogt hod: "Seid fruchtbar und vermehret euch.", do hods ja nua zwoa Leid gem. Und seit der Zeit hod se de Menschheit, i hob des mid Taschnechna ausgrechnet, circa 32 mol vadopplt. No zwoa Vadoppelungen, maximal, dann is sense, dann kenna mia an unsane Schuasohln kaun. I moan, es glangt ja etzt scho nimma, daß olle einigamaßn guat lem. Und de Mindaheit, de ses guat geh laßt, konn des aa bloß dadurch, daß de Resursn plündert und de Erdn langsam unbewohnbar gmacht werd.

A anders Beispiel: Stell ma uns den Software-Papst, den Bill Gates, in vierzg Jahr vor. Er is zwar scho gscheid senil, hod oba imma no Microsoft voll in da Hend. Des stimmt etzt ned, oba des miaß ma uns amol vorstelln. Und der Bill Gates laßt ses ned nemma, daß er as näxte Betriebssystem, nemmas amol "Supersys 2037", imma no selbst entwickt. Nix mehr lafft gscheid, ständig gengan Dateien verlorn. Oba da Bill Gates bildt se ein, daß er imma no bestimma muaß, wos bei Microsoft lang geht. Und de Leid kaffas, des Supasys 2037, und glaum, daß guad is, weils vom Bill Gates is. Kennst eich des vorstelln? Also i ned, is ja aa unvorstellbar.

Oba genau so gehts im Vatikan zua. Da Papst, der wirklich scho trulla is im Hirn, der personifizierte Alzheima, der is imma no unfehlbar. Vielleicht daat se ja da Papst irgendwann aa amol gern irrn, irrn is ja menschlich, sogt ma, oba so menschlich is hald da Papst ned. Seit dem letztn Jahrhundert hod er den Persilschein, der konn macha wos a will, ganz egal welchn Schmarrn, er hod imma recht. Beim Zimmamann seinerzeit wars grod umkehrt, dem hod ma bestätigt, daß er ned ganz sauba is im Hirn, und wenn a an Scheiß baut hod, wenn eam da Wald unta seine Fingan weggstorbn is, hod er imma no song kenna, mei i konn nix dafia, i bin hald geistig nua vamindat leistungfähig.

Oba wia gsogt, da Papst hod imma recht, de Menschheit muaß mehr wern, daß ma mehr zum Missioniern hod, und je mehr ma bekehrt, um so leichta kimmt ma in Himml, do spuits weniga a Rolln, welchn Dreck daß ma sunst no am Steckn hod.

Also, i setz meine zehn Mark af n Papst. Eine Bank für den Papst, hod er halt no a Bank neba seina Vatikan Bank. Oba mei Bank, de is sauba, de paktiert ned mit da Mafia. Und sollt i gwinna, bei dem Lotto, dann is mia des Geld, des i gwinn dabei, scheißegal.