Mei Kind, ja,ja, des muaß i seng,
Vorher hob i gem koa Ruah.
I hab ghofft, du grinst a weng
Und wingast mia a bisserl zua.

So, i, dei Papa, i bin da,
Kannst ruhig fia mi afwacha.
Du die Sonja, i Papa.
A glaab, i bring di net zum lacha.

So, bist aus da Mama ihram Bauch
Noch nei Monat außa krocha,
Hängst nimma an am Nablschlauch,
Miaß ma Supperl fia di kocha.

Irgendwie tuast du mia leid,
Muaßt grod mi als Papa kriang,
Doch i vesprich i werd mi gscheid
Um dei Glücklichwern bemiahn.

Wia i di oschau etzt a so,
Is do a Scheim, du liegst dahinta.
I kumm mia vor grod wia im Zoo,
Do da Papa, durt de Kinda.

So, liegst etzt in deim Betterl drin
Hinta oana Fenstascheim.
I sieg do zwar koan rechtn Sinn,
Doch oa Woch wird des so bleim.

I glaab etzt fast, du kennst mi ned,
Oda willst mi bloß ned kenna.
Neigeborne san halt bled,
Entweda schreis oda sie penna.

I glaab, du willst mi gar ned sehn
Öffnest ned mol deine Lida.
Naja, i werd dann wieda gehn,
Oba morng, do kimm i wieda.