I woaß no, wia i di as erste Mol gseng hob, des war im Song Parnaß, do bist no mitn Mario Lehner aftretn. Des war eigentlich ganz varuckt: I bin aus Regnsburg noch Münchn gfahrn, hob mia a Zeitung kafft, hob de Veranstaltungsanzeign durchglesn, und bin zu irgendoam Liadamacha ganga. Und so bin i bei dir glandt. Und du host ma damals scho recht guat gfalln. Im Zirkus Gammelsdorf hob i di as näxte Mal gseng und dabei erste Mol an Willi ghert. Und ab do war i von fasziniert von dir. A Fan war i eigentlich nia, Fan kummt ja von Fanatismus und des liegt mia net. A Zeitlang hob i dann mitn Weggeh kiaza tretn miaßn, da san nämlich Kinda kumma. Und de Kinda san scho wieda so groß, daß eigentlich mit wolltn, wia i di as letzte Mol in Grafing erlebt hob. Do war i allerdinga a Bißerl enttäuscht. I moan, af a Veranstaltung von da GEW hätt i eigentlich von dir scho a paar poltitische Liada erwartet. Oba guat warst trotzdem.

Und etzt machst du so einen Schmarrn, laßt di mit Kokain erwischn. I moan, eigentlich kannts ma ja egal sei, deine Liada wern dadurch net schlechta, oba de politischn Gegna host natürlich jede Menge Argumente gliefat. Blede Argumente, oba immahin.

I muaß da des etzt scho genau vazähln. Do bin i mit an Kollegn ausn Varein mitn Auto gfahrn, da Kassettnrekorda hot grod de Ballade vom Amadeo Chiowa gschpuit. Do hot mi der Kolleg gfragt, ob i net was anders her do kannt, am Radio, oda ob i unbedingt den Berufsprostestiera hern will, eam nervt er. I hob eam gsogt, daß da Wecka oana von dene is, de i am liabstn hör. Oba es hätt koan Sinn ghabt, wenn i eam erklärt hätt, wieviel politische Weisheit in deine Liada steckt, und in dem bsonders. Bei manchen is em aussichtslos. Und der selbe Depp, der hot etzt Obawassa, der kimmt etzt feixend daher, und daß er's scho imma gsogt hätt, wos du fia oana bist. Wie wenn des, wos du in deine Liada singst, dadurch net weniga wahr waar. Deine Liada bleim guat - und vor allem wichtig.

I moan, irgendwie vasteh i di scho, wer von Freiheit singt, wills aa auskostn, de Freiheit, grenzenlos und ohne Tabus. Und a bißerl frustrierend is ma scho aa, wenn ma se so umschaut. Und da dabei red i bloß von dem, wos a mia stinkt. Wer woaß, wos di ois okotzt. Wia gsogt, mia kannts ja eigentlich wurscht sei, oba es waar doch so wichtig, daß möglichst vui deine Liada hern und vasteh. Und des host etzt mit dem Schmarrn a bißerl kaputt gmacht. Und drum schtinkt a ma aa so üba di.

Des Conny, wollt i dir bloß sogn, obwohl i woaß, daß du etzt ganz andane Sorgn host.